O Consello Galego de Enxeñerías (CGES) presentará o vindeiro venres 22 de marzo o documento ‘Medidas desde a Enxeñería para o Desenvolvemento de Galicia’. O acto contará coa participación do presidente da Xunta, Alberto Núñez Feijóo.
A presentación comezará ás 9:30 horas na sede de AFundación na cidade da Coruña, situada no número 8 da Rúa do Cantón Grande. Non obstante, a recepción das persoas convidadas comezará media hora antes.
Poderán acudir todas as persoas colexiadas nos oito colexios profesionais que integran o CGES: o Colexio Oficial de Enxeñeiros Industriais de Galicia, o Colexio de Enxeñeiros de Camiños, Canais e Portos de Galicia, o Colexio Oficial de Enxeñeiros Agrónomos de Galicia, o Colexio Oficial de Enxeñeiros de Telecomunicación de Galicia, o Colexio Oficial de Enxeñeiros de Minas do Noroeste de España, o Colexio de Enxeñeiros ICAI, o Colexio Oficial de Enxeñeiros Navais e Oceánicos de Galicia e o Colexio Oficial de Enxeñeiros de Montes de Galicia.
Para asistir hai que cubrir o seguinte formulario de inscrición antes das 15:00 horas do vindeiro 21 de marzo: https://docs.google.com/forms/d/1t9G4Y5s_GEzwYtbfPSPN9VDW75bkFqGmpckLnANco9M/viewform?edit_requested=true
O documento
‘Medidas desde a Enxeñería para o Desenvolvemento de Galicia’ é un documento que recolle 107 medidas agrupadas en 20 áreas temáticas. O presidente do CGES, Oriol Sarmiento Díez, explica que “xorde da visión que ten cada Enxeñería agrupada no CGES acerca das cuestións de importancia para o desenvolvemento e mellora da nosa contorna a nivel rexional pero desde un prisma global. Por iso, condensamos ese catálogo de intereses, prioridades e oportunidades en 20 temáticas e máis de 100 medidas que buscan un futuro mellor, seguro e viable”.